吉蒂係貓唔係貓

    此貓年已半百，老貓矣。然今卻仍青春少艾，全球粉絲無數，老幼咸宜，於今盛況依然，真富貴貓也！

    Hello Kitty，人稱吉蒂貓，五十年前乃東洋銀包仔裝飾公仔，廉價品耳，只圖妹妹仔歡心。然老闆食腦，敞開心扉，任用唔嬲，只要你喜歡。由是此貓跳出銀包仔，無孔不入。於今世界，除規定煙、酒、槍外，任何商品幾乎無處不在。

    此貓圓面冇嘴，戴個花蝴蝶，圖案而已。然勝在簡單，雖無表情，卻愁自可，喜亦得，予人無限想像，故成人細路，自得其喜，各有所愛。

    有專家曰：無論如何講古，吉蒂不外貓而已。然老闆大聲疾呼：此非貓也，係妹妹仔！生於英國，真有地址，還有家人。由是不厭其煩，砌夠成個吉蒂家族。其男友更大有來頭，乃經典名片《兩小無猜》麥理斯德所飾男主角丹尼仔。亦有唔順超者：貓頭貓樣有鬍鬚，仲唔係貓！

    今日乃吉蒂貓五十大壽。

    西門公子