夫婦相處隻眼開隻眼閉

    黃德斌認同葉童見解

    將於十一月首次合作舞台劇《唔講得》的葉童與黃德斌，日前接受HoyTV主播俞詠文訪問，暢談有什麼可以“講得”！

    當葉童知道對手是黃德斌，都有少少開心：“因為我哋其實唔係好識對方，所以都擔心究竟係咩人嚟呢？然後發現呢位男士真係有啲麻煩喎！又Cool！不過相處落就發現，只要同佢傾多啲，佢就會滔滔不絕，可能係怕醜內斂啲，頭頭真係唔知佢想點，哈哈哈！”

    說回這套舞台劇，葉童表示有談及很多人性內心的世界：“好多嘢究竟講定唔講呢？如果講咗出嚟，接唔接受到個後果呢？”德斌續說：“我哋兩個一個係腦外科，一個係腦內科嘅醫生，諗嘢方法完全唔同，我要所有嘢都要講得清清楚楚。”葉童即反駁，兩人更即時上演嗌交場面，令德斌哭笑不得。

    說到人與人之間的相處，是否要完全坦誠，葉童就表示說話可以包裝：“我覺得每樣嘢都可以包裝，想話對方嘅嘢，講得正面啲，唔好咁負面，呢啲都係說話嘅技巧，同講大話冇關，可能內心好想講，但你可以將佢包裝成為唔係大話。”德斌聽畢葉童分析如何“不講大話”，立即表示：“女人有時分析嘢真係好恐怖，我就覺得大話最好就唔好講囉，係唔夠膽講，驚畀人拆穿，又驚自己唔記得講咗大話，到穿煲嘅時候，兩個人就會失去信任，彼此關係就會失敗。”

    而夫妻之間的相處之道，是否所有事情都要坦白，與丈夫相愛超過三十年的葉童，就有一套見解：“我覺得係要隻眼開隻眼閉，哈哈哈！你睇下黃德斌，幾認同呀。同老公雖然相處咗咁多年，但仍然會有唔同嘅見解，所以唔好有太多堅持去強迫對方認同，可能佢朝頭早見到我個樣嘅時候，都係隻眼開隻眼閉呢。”德斌亦非常認同葉童的說法：“所有人都係獨立嘅個體，你冇可能強迫對方一定要認同你，所以無論幾多年都好，都要保持大家可以有自己嘅獨立見解同埋思維，我覺得呢個就係最好嘅相處方式。”