四港女新西蘭拍野外真人騷

    將於九月二日播出的無線野外體驗真人騷節目《港女野人奇異記》，前日舉行宣傳活動。主演何泳芍(Honey)、胡美貽(Nicole)、廖慧儀(Jessica)及陳若思(Amber)等出席。今季四女遠赴新西蘭拍攝，Honey揚言今輯更好睇：“因為上一輯四個未熟絡，都唔知自己做乜，今輯除咗有浸野生溫泉，仲有潛水，（有冇上一季喊得咁多？）仲多過上次。”Nicole稱新一季更能顯示出各人性格特質，不過今次就沒有再帶酒上山，因為身上的行李已超磅。她說：“今次帶咗好多衫褲，因為天氣日夜溫差好大，朝早十一度要着五件褸，但下晝就三十幾度，每個鐘除一件，最後熱到除淨得個Bra Top，因為唔想孭太多行李，所以我啲衫褲鞋襪都係邊除邊掉。”

    Jessica就表示今次起程前，和Amber去了考潛水牌，因為其中一個行程要早上同海豚游水，之後再潛水。Jesscia更指節目中她們會有海量的素顏出鏡，感覺比化了妝更正。可擔心零化妝會趕客？Nicole說：“唔會，依家啲觀眾鍾意睇最真實一面。”Honey認同，表示沒理由潛水都化妝。