鍾慧冰家燕姐同為縮水舖苦主

    前港姐鍾慧冰（冰姐）日前到新城廣播接受薛家燕、黃思敏和范振鋒主持的《開心大派對》之“開心家訪”訪問，冰姐透露和家燕姐已廿多年沒坐在一起聊天，對上一次是兩人誤買“縮水舖”事件。家燕姐苦笑稱：“廿幾年前我哋曾經共度患難，我買咗百幾萬，完全開唔到舖，話有百幾呎，但中間有條柱，賣返出去十二萬，嗰時有百幾人‘中招’，好大新聞，我仲去咗港督府請願。”冰姐即謂：“我慘過你，除咗縮水舖，仲買咗縮水樓。”

    家燕姐和冰姐又在節目中大談健康，冰姐重提自己二○一六年突然患上血管炎，以致右手和右腳不能郁動，“係免疫系統出咗事，自己打自己，襲擊我啲神經，同埋我啲血管發炎指數好高，右手右腳唔郁得差唔多年幾，啲手指完全冇力，連名都簽唔到。”家燕姐聞言即謂：“嘩，好大件事喎！”冰姐續說：“佢哋話呢個病好容易就走（死亡），因為冇藥食，惟一可以食類固醇，但食得多又唔好，我食咗三個月，一日食九粒，食到塊面腫晒，變咗豬頭咁，好彩慢慢控制到。”後來冰姐用了兩年時間才慢慢可以走路，但康復的路仍十分漫長，除了要做物理治療，還要每四個月驗一次血檢查身體發炎指數。