好姊妹驚喜拉隊撐場

    鍾嘉欣重演婚禮扔花球

    鍾嘉欣(Linda)演唱會廣州站昨晚廣州中山紀念堂隆重舉行，Linda相隔十年再開個唱，反應熱爆，全場座無虛席。好姊妹岑麗香、李亞男、苟芸慧、王君馨及好友黎諾懿與太太李潔瑩，亦拉隊到廣州捧場。

    Linda以經典金曲《一顆不變的心》為演唱會揭開序幕，期間更以勁歌熱舞上陣，掀起全場熾熱氣氛。不過最叫觀眾驚喜，莫過於Linda獻唱《我結婚了》，她還向觀眾扔花球，分享人生重要的一刻。

    為完成今次個唱，Linda連月來努力練歌排舞，重拾巓峰狀態，最終亦不負所望，她在演唱會一共演繹廿一首歌曲，當中包括為人熟悉的《其實我不快樂》、《一人晚餐》、《日夜想你》、《最幸福的事》等。最令Linda感到挑戰，絕對是以熱舞跳唱演繹《Love Love Love》、《得閒找你》及《夢伴》等，她說：“今次演唱會係花咗好多心思，一步一步計劃出嚟，最大挑戰係跳唱環節，始終好多年冇跳舞，所以我跳出舒適圈好努力咁練習，好開心最後可以好順利完成，希望自己可以繼續做到老學到老，繼續挑戰新事物。”

    對於一班好姊妹與好友專程到廣州撐場，Linda大感驚喜，她說：“唔知道佢哋會嚟，之前君馨又話要開會、亞男又話要返工，個個都好似好忙咁，佢哋突然間出現晒，好驚喜。”而問到屋企人可有到場？Linda指：“今次家人冇嚟，因為太長途，佢哋都覺得有啲可惜，希望將來佢哋可以睇到一次我嘅演唱會。我同囡囡講‘唔緊要，媽媽會繼續加油，下次睇我演唱會，演出會更加勁嘅’，而我老公，佢一定急不及待完騷後喺網上搵片嚟睇。”

    Linda又笑言完騷後要食好多煎炸熱氣食物：“我要食好多熱氣、好辣、好炸嘅嘢，因為呢排要好好養聲練氣，飲食上都好節制，完騷當然要食餐勁。同埋想第一時間返加拿大見我老公同啲小朋友，好掛住佢哋，我哋日日都有視像，有時短暫嘅分離，會令大家關係更加思念。”