人帥戲好惜冇運

    一九六二年，大衛連拍了部經典名片《阿拉伯的勞倫斯》（港譯《沙漠梟雄》）。當年在奧斯卡大殺三方，囊括最佳影片、最佳導演七項大獎，唯獨演出博晒命之男主角彼得奧圖得個吉，畀同年黑白片《殺死一隻知更鳥》（港譯《怪屋疑雲》）格力哥利帕攞走小金人。

    彼得公一世冇運。人帥戲好，雖八獲提名，依然兩手空空，發牢騷曰：唔該，到八十歲至好畀獎我！牢騷歸牢騷，奧斯卡最後仍畀個神台獎“終身成就”，還佢心願。

    雖如此，彼得公仍公認係好戲之人。《阿拉伯的勞倫斯》雖係殖民者自白，佢演來不作他想。與柯德莉夏萍演《偷龍轉鳯》，輕鬆搞笑；與嘉芙蓮協賓演《冬獅》已成經典；演貝托魯奇《末代皇帝》莊士敦，則係典型人之患。然亦唔介意演《羅馬帝國艷情史》之流的剥衫戲。

    彼得公想當記者，做過播音。出身於英國皇家戲劇學院，曾演過莎劇，發跡於電影。拍戲唔多，全球響垛。十一年前八十一齡仙逝。今日乃九十二齡冥壽。

    西門公子