戲裏戲外老牛食嫩草

    基哥，何生，老牛食嫩草，街談巷議；扯上了“Benz哥”許紹雄……劇中，二八嬌妻七十歲郎，歡場女子愛上富豪，點只“七層樓”，一碗“補腎湯”咁簡單，網民竟將三隻吃嫩草的“老牛”相比，分不出戲裏戲外了。

    人生如戲，戲如人生，“Benz哥”，富豪太子爺上身了——“好似啲層次唔係好啱喎！年齡方面，‘DaDa’陳靜，我個老婆仔嫩口好多，後生過新何太、王青霞（Chris）, 標青好多……（可覺得網民想像力太豐富？）可能係今年潮流興老牛食嫩草呀！好多隻老牛好精神。（獨見你隻老牛令DaDa小產？）劇情需要啫……”

    現實生活中，許紹雄娶新加坡太太，女兒大學畢業後，開咖啡餅店，家庭溫暖，同心合力，事業順遂。近年，有指Benz哥移居新加坡，但他坦言自己主要居住香港。總不明白，當地人以為他長居獅城：“我話移你個頭，我仲係攞住特區護照。佢哋鍾意講乜就講乜，由得佢哋以為囉。（網上指你新加坡籍？）伸直就有！哈哈，我可以長期居留，但未入籍。”

    縱橫香港影視五十多年，Benz雄被問演藝生涯可有目標？“錢！哈哈。”他認真地説：“養妻活兒。無憂？都憂！我好鍾意拍劇，由頭到尾都唔覺得辛苦。鍾意，就唔會悶啦。開工，又有錢，又有人同你玩，點解唔做。（可會像‘修哥’胡楓永不言休？）毋須做得太辛苦。但做人要有寄託，否則，好快魂歸天國！”

    “我認識佘詩曼二十多年，佢冇變，一直都係咁青春美麗，一樣咁好戲。我相信，有天生藝人，亦有不是天生的藝人……戲劇世界好奇幻，人夾人緣。”Benz哥喜孜孜説戲緣：“我與阿佘，已合演多次父女。”二人在《家族榮耀之繼承者》中再扮演父女，更在吉隆坡拍攝時上契。

    據講，Benz哥被邀在劇中演娶嫩妻的風流伯父時，有點猶豫。不料，總監製梁家樹説，“阿佘答應咗做你個女嘞。”後來才知道，他同一番話亦對阿佘説：“Benz已答應做你老竇嘞……”兩人在劇組報到時，才知道監製巧施妙計，輕鬆兩句話，他們第一時間加盟了。

    二人執到寶，劇中父女相依，Benz哥更執到“草”——“老牛食嫩草點會抗拒呀，食唔食得到係另一回事。”談到跟新一代艷星DaDa首度合作，他笑言：“我好濫交，好快大家已熟絡。”

    高梁