新何太聰明反被聰明誤

    街談巷議，對何伯、新何太事一知半解——好多人唔明，點解何伯去銀行攞唔到錢，但佢個細女又可以攞到？銀行係咪有措施保護老人家戶口？

    佢聰明反被聰明誤！有“正義女俠”之稱，明星出身的律師翁靜晶，亦有注意《東張》，何伯話：“我都幾十歲，希望我走咗之後，佢可以承繼得到。”何太激動插嘴：“係處理得到，你唔好講承繼……”是否她想自己承繼？

    如果，爸爸寫遺囑將所有嘢畀晒老婆，搵晒醫生律師證明神志清醒，呢張遺囑係成立的。法律界人士解釋，“佢爸爸有權將所有嘢，通過遺囑畀晒佢所指定的人，畀晒工人姐姐都得，無人可以阻止。就算捐畀慈善機構都得，有的外國人成立基金，將財產畀晒貓狗，只要搵律師或者信託人管理。”

    如果，何伯打官司，聲稱當時四百五十萬不是送給女兒，只是由她管理……

    翁靜晶認為：女兒也不一定輸，《東張西望》條片好有用。爸爸錄影講，當時畀細女係方便承繼，都係諗住送畀佢……法律上，亦有一樣“饋贈假定”，是古法，好多外國地方都已廢除，但香港仲有。法律上假定，老公送畀老婆任何東西，法律上都係假定禮物；也包括爸爸送畀仔女嘅嘢。所以何伯的四百五十萬都係假定禮物。所以，《東張西望》這條片——將來有乜冬瓜豆腐，可以有人承繼，係有用證據。

    四百五十萬另一個關鍵——如果，係爸爸和媽媽辛苦儲返來。太太九年前去世時，如有分身家，爸爸分一半，另一半分子女……如果，將錢全部入晒爸爸同子女共同戶口，係幫大家保管。“我覺得打起官司，個女機會係唔細。重要計埋年紀因素，阿伯今年七十六歲，官司一拖，有冇十年時間去打呢？”

    “大媽最錯，參與太多！”翁靜晶直言：“如果，當時佢唔係跟埋去銀行，令銀行起疑，又或者，何伯帶埋律師去提款，結果可能好唔同。今次，伯伯帶咗呢個可疑人物去，提高咗銀行警覺，攞唔到錢囉。呢個人聰明反被聰明誤，亦為大家帶來唔好印象。”

    “提早取定期，罰息十一萬。”故作離譜做作，係銀行職員醒目，見阿伯身邊多咗個唔知乜嘢女人，略施阻嚇，緩兵之計。聯名戶口，要兩個人簽名，“後來，又可以一個可以拿到，”翁靜晶表示：“唯一解釋：銀行保護緊呢個老人家！”

    高梁