梁小冰演老婦真好戲

    演一位又老又殘、蓬頭垢面、衣衫襤褸的廟街小販老婦，久別復出的梁小冰，亮相《奇案2》，嚇你一驚……戲中這位“黑社會之花”，三十年過去，仍是兩位老男人的夢中情人……高級警司甘冒警例為她洗脫冤情；富商變賣家產，準備與她到葡萄牙終老。梁小冰演殘年老婦，情海翻波，“執手相看淚眼，竟無語凝噎”。愛情的死灰復燃，顚倒兩位蠱惑仔出身的情種，津津有味，引人入勝，好好戲。

    小冰自言本來不想復出演戲的，“去年一月體重一百三十二磅……”，有伯樂然後有千里馬，“點知家豪哥（總監製）、志江哥（監製）打電話邀請我，令我有動力去減肥，入廠時減到一百一十六磅，現在一百〇四磅，簡直重生一樣。不過……”小冰大嘆：“Baby Fat襟老唔襟瘦，就算瘦到條籐咁，塊面都係肥肥哋。”

    半老徐娘，化妝殘年老婦，只需要半小時，小冰踢爆：“化妝師好犀利， 擺咗半打架生檯上，係咁噴，之後，逐條逐條頭髮染白，最緊要係大刀闊斧。”監製精心設計的“黑社會之花”老妝，播前保密，“化咗妝後，許多演員要求合照，我要諗好多理由去拒絕。樣醜又兼逢雀屎，廟街拍外景，講戲中蠱惑仔收保護費掃場，亂七八糟，熱到由頭濕到落腳；這裡大榕樹，還有雀屎不斷跌落來，‘中頭奬’也不敢作聲，走投無路的苦情，內心流露的。”

    三十年外地牢獄之災，回到香港，以為已是“殘花敗柳之身”，心死了，兩個社團舊馬仔，竟然三十年傾慕不變。小冰在劇集中，分分鐘在嚎啕，這些熱淚，感恩遇上癡情男人。這女人太幸福了，戲裡，還包括戲外。

    梁小冰與陳嘉輝，眞正夫妻上陣，劇中演“癡心情長劍”。現實中，嘉輝哥亦是愛妻號。小冰自爆夫妻“晨早無人私語時”——“我老公好玩得，每日起身都會話：‘你好靚喎！’結婚二十幾年，起床先給我甜言蜜語。有時，我個頭好似包租婆，佢都會話：點解可以咁靚。”

    “我的性格，有問題會巴拉巴拉爆晒出來，佢叫我慢慢講……”小冰爆老公冧妻法：“佢叫我最嬲時唔好講，寫出來。我曾經試過，寫幾千字就唔嬲了，現在轉用WhatsApp……”夫妻多年，無聲勝有聲，唔講都知大家諗咩。

    高  梁