美國名肆牡丹樓

    六十九年前今日，首家麥記在美國開檔，M王國自此改變世界飲食文化。卅四年前此物落沓華夏，一時引起哄動。然鬼佬文化之於國人，既愛且恨。人腦鬼腦，終究不同，雖同一物，卻見馮京馬涼。

    叔父一行遊美，時已逾旬，日日鬼佬餐，食極生厭。忽聞僑領安排：“今日請去牡丹樓！”聞者欣喜，終於得嘗國菜。一行歡天喜地，心懷期許，美食當前，三步拼作兩。抵埗，唯見大隻M字當頭，登時媽聲四起：又係麥記！

    僑領好心着雷劈：並無呃你，呢處真係牡丹樓！原來僑領原籍廣東台山，鄉音如此，非戰之罪。

    靚女遊香江，甫入境即彈入的士，高呼司機“去侏儒村！”司機一頭霧水：香港地，曾聞二奶村，卻無聞侏儒村喎！靚女口硬：有，侏儒村有靚衫賣！幾經周折，司機終於明其所以：靚女原來要去“知二千”！

    上海人以鹹淡廣州話自我介紹：我係上海來(口+架)。廣東人笑甩脾。若唔識笑，你未算真正廣東人！

    西門公子