許廷鏗簽名會忘記帶筆

    日前，許廷鏗(Alfred)舉辦新歌試聽會及簽名會，當日雖然舉行簽名會，但中途發生“蝦碌”情況：“我本來準備咗十幾枝簽名筆，不過呢一刻應該仲喺我張床度。簽名會唔記得帶筆真係黐咗線，好彩我有個美麗嘅粉絲借咗枝筆畀我，應該都頂到兩站嘅，不過都叫同事幫手去撲筆。”他笑言自己與粉絲沒有距離，仲話自己不時周圍去，希望與大家貼近：“希望用自己嘅影響力畀其他人聽到，所以好多時作品源自粉絲嘅DM，成為創作嘅養份。而出碟係因為自己老餅、老派，想要有實物喺手。我當唱片係自己嘅卡片，不過張卡片嘅製作費好貴，只要有人買同想我簽名，都會製作。”

    當天由中午兩點簽到晚上九時，粉絲在沿途各站上車見偶像，Alfred簽名簽到手軟：“坐電車做新歌試聽會及簽名會，我之前好忍手唔幫粉絲簽名，因為想等到今日先簽，可以喺電車度同大家傾吓偈，我同歌迷之間似朋友多啲，佢哋已經唔會尖叫，所以會以親民為主。”Alfred新歌《多多指教》推出在即，即將到海外宣傳：“廣東話有時頗受限制，但如果可令其他地方了解多啲廣東話，呢個講法有啲偉大，但最想自己嘅音樂去到唔同嘅地方。”