五官生來爲拍片

    “賓虛咁場面”，此語上世紀曾一度盛行，場面虛冚之謂，源於六十年代荷里活電影《賓虛》。猶太人反抗羅馬帝國，兼有愛恨情仇，男主角就叫賓虛。片中場面宏大，尤其馬車搏殺，於無特技年代得此效果，至今仍屬經典，好事者許是作“奔墟”之誤而形容之。

    演賓虛者，係銀幕硬漢查爾登希斯頓。此公米九身裁，體形魁梧，形象“英雄”到痹，天生專屬演偉人，《十誡》演猶太先知摩西，當無後來者。佢五官稜角分明，正氣之極。更云佢個希臘鼻係荷里活偉人招牌。查公更老實不客氣：“我五官係為拍片而生！”故叔父昔日睇戲，不必理戲名，係查公演，肯定大片，去馬可也。

    查公生於美國，有英裔背景，嘗單親，後油瓶仔。中學已出演，二戰曾服役。戰後扶搖直上，係荷里活黃金時期銀壇紅人，憑《賓虛》獲奧斯卡最佳男主角獎。其電視劇《豪門恩怨》曾在內地熱播，也曾應北京人藝之邀來華參與話劇創作。十六年前今日，查公以八十四齡仙逝。

    西門公子