群姐辛苦湊大三個仔

    帶三個兒子，一點也不容易……“群姐”許思敏的人生，比戲劇更加戲劇：“大仔七個月就出世，我患肝炎，早產。但每日要去醫院，隔住玻璃，望住個仔，站上幾個小時，醫生囑咐我，身體太弱，不要外出工作了。BB太弱，無人肯帶，萬一……誰來負責。若請工人，亦不放心，唯有自己照顧兒子，我雖然是新手母親，醫院的人都讚我：你好厲害，把兒子照顧得肥肥白白。係呀，係呀，我都唔知點解會湊到個仔肥肥白白……”

    母性天生，許思敏表示：“做女人難，做母親更難，做有病兒子的母親，難上加難。”“群姐”許思敏説：“我擔心，我害怕，我哭泣，又唔敢喊。聽朋友講，孕婦要放開懷抱，不要哭泣流淚，否則，將來會影響雙眼。”可憐天下父母心，唔喊唔得，淚在心裡流……

    某日晨早，“群姐”接醫院電話：你的BB可以出院了。她成個彈起，抹吓面，牙也忘記擦，着衫飛身出門，好興奮，兒子可以出院了。“之後，可以自己照顧。”回想起剛過去的一段日子，眞係好辛苦，每當到醫院探望BB，陰功，有條小小喉管滴着餵奶，太弱，不能用奶樽。難為了母親，許思敏一拍心口，“不如我餵人奶……”不能，BB太弱，有氣冇力，只能用小小喉管滴着餵奶。唉，每日到醫院，隔着玻璃站着看幾個鐘……

    兒子可知母親嘔心瀝血的艱辛？“知！”“群姐”許思敏説，“有時，母子都會有爭吵，我會説，早知當時不要你，等你自生自滅。兒子會嘻嘻笑：媽媽你唔會，一定唔會，點捨得我呀！我們母子之間，有時像朋友，經常説笑……”

    “我們那個年代，學校派成績表時，一定要家長與小朋友同時見老師，好認真。有什麼評語當着家長面直接對小朋友講，當時的先生，好犀利，咄咄迫人，好話壞話照講。人無完人，死嘞，有時，我都要駡兒子幾句，良藥苦口，忠言逆耳，母子關係便有些不協調。如果説，人生有什麼低潮，就是這個時候……”

    “教？冇乜點教，功課亦冇乜點睇，因為有三個仔，他們互相指教，家中有幾個小孩，很有好處的。”大仔二仔向群姐投訴要放棄三弟，話搞佢唔掂……

    群姐笑説：“第三仔最近向我投訴：媽媽，現在才知教孩子很辛苦，我教我個仔，想死，明白兩位阿哥當年的心情。”

    （揭開“群姐”肚皮 · 三之三）

    高  梁