日漫鼻祖喜捉蟲

    宮崎駿，日本漫畫大師，其系列卡通片《天空之城》、《龍貓》曾陪大一代人。若說日本漫畫界開山鼻祖，則非手塚治虫莫屬。或因手塚作品專屬細路，不似宮崎駿大人細路通吃，除非由細睇大，否則唔知佢乜誰。

    手塚原名手塚治，細時喜捉蟲，索性改名手塚治虫。年輕時適逢二戰，學醫，成博士。然卻心繫漫畫，卒之轉行，開日本連載漫畫先河。其《鐵臂阿童木》養大幾代日本人；今日本漫畫眼大、臉圓之美少女形象，皆自手塚公始，引領潮流至今。

    當年手塚公為推廣連載漫畫，降低製作成本，平平都接。宮崎駿公雖佩服佢畫功，仍閙佢搞壞市，令行家搵食艱難。然手塚公我行我素，日本漫畫卡通才有今天。

    手塚公早年曾製作過《西遊記》卡通，對製作中國卡通《大鬧天宮》的漫畫家萬籟鳴十分敬重，兩度來華訪問並拜會偶像。兩人並合作一畫“孫悟空攜手阿童木”，惺惺相惜。卅五年前今日，手塚公歸道山，年僅花甲。

    西門公子