合拍MV反應理想

    許廷鏗開個唱邀欣宜回歸

    許廷鏗(Alfred) 早前宣佈聖誕節期間將於西九竹翠公園舉行演唱會，粉絲得悉後十分雀躍。

    Alfred日前推出新歌《一場同學》的MV，邀請鄭欣宜(Joyce)擔任女主角，引起歌迷熱議紛紛，表示被二人深厚友情感動。Alfred透露好友狀況：“大家睇到佢演出都應該知道佢狀態真係好好，我哋當日拍足二十個鐘，佢由朝到晚都一如以往咁專業同充滿正能量，令整個拍攝團隊都好歡樂！以我所知佢已經非常ready投入工作，好快大家會見到佢。作為朋友替佢開心，希望大家熱烈歡迎佢回歸！（會否邀請欣宜睇你的聖誕演唱會？）何止約佢睇，我直頭邀請佢做嘉賓啦，大家都掛住舞台上嘅Joyce啊！不過佢仲未應承我，你哋見到佢都幫我追追佢啦！”

    近日Alfred除了宣傳新歌外，還為自導、自演的聖誕演唱會及聖誕市集忙過不停：“近來我不停開會同籌備呢啲項目，真係好忙，因為成個演唱會同市集咩都關我事，甚至聖誕市集內啲檔攤，全部都係我自己親自挑選，所有都係我鍾意嘅衣食住行小店。市集每日show前都會開放，公眾免費入場，希望大家有個開心熱鬧嘅聖誕節！至於買飛入場嘅歌迷，建議早啲到，食買玩完就入場睇show，由入場到離開都充滿節日氣氛，當去旅行，唔好浪費咗個聖誕節。”

    除了親自策劃之外，Alfred都忙於為演唱會健身、排舞及彩排。他坦言自己已減了十多磅：“我一直都好想挑戰開戶外騷，但需要嘅體力真係比室內演出大好多，加上今次繼續有WinWin同KC幫我排舞，佢哋好有energy，所以我都要嚴陣以待。”

    除了健身排舞練體力應付演唱會之外，Alfred每星期都會上唱歌堂提升唱功。談到演唱會的內容時，他表示：“你哋都知我係鍾意每場都有唔同歌單，所以要練好多歌啊，不過今次準備好多大家耳熟能詳嘅歌，到時一齊大合唱等我偷啲時間飲啖水！（仲有乜秘密武器？）大家真係要親身入嚟睇，因為淨係個台都已經超乎你所想，自己做老闆係可以任性少少，落足本啊！”