做壞行規的記者

    武打小子當道，孟海短小精悍，身手了得，造星運動……傳他與美國女打星羅芙洛拍拖，異國情鴛夢，娛記趨之若鶩，宣傳部專宴，讓友好娛記專訪羅芙洛，問題任你問。這位美國女打星，卻令一位香港娛記消失了……此話怎講——

    羅芙洛又靚又打得，對娛記們友善，她説，“好高興與大家見面，還望多多指教……”宣傳大員非常識做，“大家千祈唔好客氣，隨便問，佢亦應承知無不言……。係咁先，我將羅芙洛交咗畀你哋，唔好同佢客氣，我有事走先……。”

    你望我，我望你，衆記不發一言。羅芙洛大大方方，嘻嘻笑。“喂！阿×！你問啦，你識英文。”阿姨輩娛姐直言，“得你一間英文報！”岔開一筆，那些年，娛記水平相當高，為了探討七、八十年代影視高潮，芸芸娛記不時閃現社長夫人和老總夫人，學歷很高，只用眼和耳採訪，不用口的。娛記晩晩考牌了，稿件過完一關又一關。

    “我唔會問。等咗好多年，才有今天一個機會……。”英文報記者阿×，直抒胸臆。“平日，都係有你哋問，冇我問，攞料詳細過我。今日，我要獨家，唔做翻譯，威返一次！”以為講笑，但眞眞冇咁眞！

    吓？有哥仔跳起，有阿姐喘粗氣，居然有如此冇品的行家。娛記有不成文行規，每到下午四時一刻，集合電視台門口梯級，各自報料，匆匆筆記。解開了一個謎——各報章都有三至四大版娛樂新聞，中外百幾個明星、藝人見報。大多報館的娛樂記者只一、兩個，分工“影”與“視”。日日寫十多條娛樂新聞，三頭六臂麼？近百行家“集採廣益”也。

    香港地，書院仔讀到F5，可做到偵緝警司陳欣健，校友黎小田可做到音樂總監……。至今殘迹仍留，有名校中五畢業藝員，引以為傲。時至今日，記者都要大學畢業，藝員必須經過專業訓練，司儀粵語、普通話，英語流利……人説，香港影視藝術日下，錯！係與日俱升。

    英文報記者，明目張膽，不守“行規”，不為羅芙洛專訪翻譯。“我試下！”另一位小妹妹開腔。羅芙洛暢談孟海戀情，藝術同路，中英文化差異，暢快淋漓。羅芙洛當時很願意在香港落地生根的……小妹妹公司見習，香港大學英語系畢業，本當律師，對娛圈好奇，玩一玩何妨……

    後記：不久，娛記們在貴賓房專訪明星，不速客闖入，“我係阿×，做人壽經紀，幫襯下啦。”……終於知道，搵食講人緣。

    高梁