劉威煌成為五燈選手

    日前播出的一集《中年好聲音2》，首位五燈選手是卅八歲的譚輝智，報稱任職廣告設計的他獻唱《心碎了無痕》，出色表現為他贏得五燈佳績。他透露未有參加過任何歌唱比賽：“好想喺四十歲前做一樣我未做過嘅事，亦想將呢個經驗送畀我兩個小朋友，畀佢哋知道爸爸都突破過自己。”

    第二位五燈選手則是第一屆《超級巨聲》參賽者，兼曾推出個人專輯的劉威煌，現於製作公司擔任策劃工作的他，獻唱《愛上一個不回家的人》，憑着深情演繹獲得五燈。伍仲衡笑言：“你唔使食黨參，夠晒氣，非常夠氣！”威煌坦言曾有一段時間沒有再做關於音樂的工作：“有段時間係有啲掙扎，覺得唱歌係一種壓力，覺得唱歌係要嚟搵食，搵唔到食就唔可以唱歌。”肥媽鼓勵他說：“唔好離開一樣自己鍾意嘅嘢，你可以將唱歌視為副業或者興趣，唔好將自己鍾意嘅嘢抌低，你睇我哋Bill哥哥（吳大強）人哋幾多歲呀，你幾多歲呀？”威煌笑言：“依家四十三歲，聽日四十四歲。”肥媽即時祝他生日快樂並說：“唱落去啦，唱到八十歲啦！”