Do姐但求開心唔理收視

    直面“農夫”兩個“儍佬”，Do姐大喝一聲，“你兩個正垃圾。”咁，又畀我哋跟住你？“因為係有用的垃圾。”輕輕一語，引起哄動，收視狂飊……今天，同一個Do姐，也主持旅遊節目，簽“生死狀”坐戰機飛越阿爾卑斯山，好得人驚，搵命搏的表演，收視——三點！

    以鑽石主持人身價，Do姐過檔HOY TV，重現當年TVB旅遊節目模式，帶着猛男去歐遊。《去邊啊Do姐》的收視報告，電視台遲遲秘而不宣，“不正常狀態”下反增好奇心，據非官方數據，只是網上流傳，首集平均收視三點，第二集二點七點，第三集一點九點，第四集二點一點，第五集二點二點。甚麼概念呢？《去邊啊Do姐》面對同時段TVB播映的《破毒強人》結局篇，後者最高收視二十六點九點（約一百七十三萬觀眾）。

    評論指，Do姐仍是Do姐，重金禮聘挖過HOY TV，出動幾名男神隨侍左右，“卻未見火花，其中洪嘉豪跟Do姐遊德國，Do姐問嘉豪有何心事，回話只介紹黑森林蛋糕……相比在TVB期間，Do姐跟農夫拍檔時，互窒搞笑，甚富娛樂性。”更有視評指出，重中之重，Do姐沒有了TVB光環，大多數家庭觀眾，只慣性看電視，不看是哪些藝人，收視難比較。不過，現在看電視的方式很多，收視不代表全部的。

    鑽石級主持人，最高收視三點，“現在不比從前……”Do姐面對現實，“我冇期望。拍攝時，盡量做到最好，其他就交給監製和電視台，加上現在有很多網上平台，收視已經不同以前了。（現時有幾多收視點才算合格？）我唔知幾點，完全冇理……只要拍得開心，拍完收工，我都係一個觀眾……”

    四十年在TVB，跳槽HOY TV，除了人夾台緣，關鍵在人夾人緣——不同拍檔有不同性格，便有不同的化學作用。“很開心，個個都有人鍾意。”Do姐強調，“眞心講，個個拍檔都幾好，好多謝他們陪我玩……”

    斯文淡定，口才出衆影后級Do姐，遇新挑戰，坐戰機飛越阿爾卑斯山，之前講到好得人驚——綁到成隻蟹咁唔郁得，三百六十度大翻轉，有啲暈。“人生第一次簽‘生死狀’，我想試滑翔傘，人活一次，甚麼都要試吓！”

    高  梁