愛華頓今屆潛伏危機

    英格蘭超級足球聯賽兩輪之後，外界認為被拆骨之後會成績下滑的白禮頓，竟然兩戰兩勝在積分榜上排在第一位，曼城和阿仙奴兩支上屆冠亞軍保持水準，排在二、三位。賓福特開局不錯，利物浦雖然在轉會市場被車路士打得措手不及，仍然穩站第五位。紐卡素第一場有驚喜表現，第二場被超班的曼城勉強擊敗，今屆絕對有機會繼續取得好成績。

    今周賽程紐卡素對利物浦是重頭大戰，曼聯對諾定咸森林亦有一定睇頭，其餘比賽反而要留意榜尾兩支球隊狼隊對愛華頓，如果開局三連敗，對於球隊整體信心有極大影響。狼隊實力佔優，愛華頓亦有一股永不言敗的拼勁，兩支球隊誰能在對手身上攞到三分，對前景有極大幫助。

    今晚六場比賽，倫敦雙雄分頭出擊，阿仙奴對富咸一場絕對有把握取勝，熱刺雖然作客般尼茅夫，但狀態大勇的熱刺亦可以取得勝果；賓福特對水晶宮兩隊之前交鋒都會出現以防守為主的格局，亦經常出現打和賽果，賓福特暫時成績不俗，亦會希望保持不敗，今場波相信都會打和居多。狼隊對愛華頓的六分戰，以狼隊往積佔優，雖然今屆狼隊出售多位球員，但大部分都非主力，新加入只有四位球員，從馬德里轉來的古夏恩值得期待，經過適應期後，狼隊絕對可回到中上游位置。

    愛華頓對上幾屆積弱，今季加入三十八歲老將楊格和向維拉利爾借來袓斯馬算得上較有級數，但整體積弱，如果没有突發情況或轉會出現，愛華頓今屆絕對是降班熱門，今場比賽狼隊取勝機會較高。

    足球評述員  微 灝