昨晚賽事總投注逾五百三十萬

    高君濤三元進帳

    昨晚本季度沙地壓軸戲順利完結。是仗戲碼一般投注額大增，五場共收五百三十一萬七千元。

    頭場跑出熱頭冷腳。馮耀正廄“大灣玫瑰”由高君濤主轡，出閘搶先彈出，沿途貼欄領放一口氣直帶到尾，輕取對手而回。此駒在上手馬房時屢拼不出頭，最叻只跑二三名。最近轉投馮耀正廐重新部署，今次居六班作戰形勢佔優，遇上同場快馬不多，出閘搶放帶返打開來澳勝利之門。“大灣玫瑰”轉倉後開齋，騎、練攜手建奇功。

    第二場高君濤、馮耀正攜手起孖。馮廄“步快如飛”季內沙地演出甚準繩，惟易位難贏之馬，連仗高君濤跑來未竟全功，上次出戰一三五○米又遇伏兵屈居次席。拼後小休回師短途再搏，騎者出閘快步跟住第二位，沿途亦步亦趨，埋門展開衝刺挫敗對手，替馬匹勝回一仗。“步快如飛”今仗沙地壓軸戲贏馬標尾會，騎、練亦齊齊起孖。

    第三場梁曉傳騎梁國浩廄“珍珠大哥”，以大熱姿態取勝。此駒季內跑沙地表現水準穩定，且路程長短皆宜。上次劉傲主轡跑一三五○米贏完再來，今次原程續戰改配梁曉傳執鞭，被捧成大熱。騎者出閘快放帶頭，全程愈放愈有，以輕鬆姿態掄元，替馬匹摘取今季第六W。梁曉傳贏馬，浩廄添一W。

    第四場高君濤中三元。此子頭、二場起孖後手風大順，是場騎張兆煊廄“西門吹雪”，以較佳留放後上挫敵。此駒季內暮氣沉沉無建樹，近期轉投兆廄重新操練。上次跑短途得梗頸四，今次復跑中距離易配高君濤主轡，負重磅贏來從容，替馬房建功。兆廄贏馬交代，騎者三元進帳，成績一枝獨秀。

    尾場徐錦輝騎譚廄“好好”爆冷食尾餬。此駒連季無甚建樹，馬匹沉寂多時令捧場客輸至怕怕。上次韓將趙韓星主轡大敗而回，今次落班出戰，用徐錦輝操刀成三十九倍冷門，結果爆個不亦樂乎。譚文就廄增添一W，徐錦輝食尾餬埋齋。