執筆吹水兩皆能

    人稱才子，佢自謙唔夠格；因在電視擺龍門陣，與金庸、倪匡、黃霑人稱香江四大才子。於今碩果僅存，剩得佢矣。吃喝玩樂集一身，執筆吹水兩皆能。得此技者，唯才子蔡瀾也。

    “健康秘訣七個字，食煙飲酒唔運動”係佢警世名言；豬油撈飯佢至愛。問佢全球美食可飛起邊道菜，佢揀火鍋，認為此食“冇文化”。由是食界爭論滾熱辣，佢闊佬懶理：“唔啱聽者，當佢唱歌。”

    電視上才子豪飲勁食，見之開心。然佢笑語西門：“對住鏡頭就係！”倘學佢鏡頭前鑊鑊酒酣飯飽，入醫院得矣。才子深諳養生之道，慎食做騷兩不誤。佳餚美酒每點到即止，謹而慎之。

    才子原籍星洲，因不喜政府“乜都管”，索性落戶香港，自認係最明智選擇。然最後竟落籍馬交，年年照分政府萬金。唯當年搞了個飲食城，未能善終。今日乃蔡才子八十二齡壽誕。

    西門公子