祥駒路合可勝此陣

    今午上演五場草地黃昏賽，外地馬暫停轉播。昨天曾落大雨，料今日場地會受影響，屆時跑乜地馬迷宜留意。季尾兩位日將中野省吾及田中正一手風大順，前者連仗交出好成績，上賽又替鄒廄“得運威威”贏馬，刻下氣勢正盛。此子有鬥志，且策騎線路夠廣，多位廄主樂意供馬搏殺。今仗手上不乏惡馬，值得重視。

    田中正一最近表現亦唔差，上仗賀廄“興測”交其操刀即爆冷，可見受練者重視。論騎功田中正一唔差，陣上肯打真軍，下風馬跑高半班。今仗五駒出戰頗具份量，料有頭馬見面，臨場吼緊。

    第一場：五六班千二米。“莫特上校”連仗無戰功，乃練者着意替馬匹減分。今次落班復爭千二米擺明有計。此駒拼後重新打磨，交由田中正一主轡，騎者以往摸過此駒已駕輕就熟。今遇同組對手弱旅居多，形勢逆轉，勝機來臨。

    第三場：二三班千五米。“祥駒”季內田中正一主轡取兩捷，人馬好拍檔。此駒上仗爭打吡大敗，顧偉樂騎來全無章法。拼後小休回師首本路，復配田中正一操刀不同估計。“祥駒”跑此程拿手，路合且排一檔有利，憑騎者摸熟馬性，可勝此陣。

    第五場：五六班千二米。“印度大師”上仗同程後追不及只得梗頸。敗後小休再來，今仗交田中正一操刀配搭不弱。此駒質新實力未用盡，季尾狀態保持勇猛，能跟可鬥，欣逢地利如魚得水，可食尾餬。