再做主持撇甩陸永

    C君大讚新拍檔謝嘉怡

    鄭詩君（C君）相隔兩年再為無線主持節目，這個全新遊戲問答資訊節目叫《咁你都唔識》，一齊任主持人的還有謝嘉怡(Lisa)及黃紫恩(Jojo)，節目將於下周四起播出。

    C君表示，這個節目透過刁鑽的答問環節，測試嘉賓的Common Sense指數，問題涉及常識、飲食、文化、生活、交通及職業等多個範疇。

    首集嘉賓有林盛斌(Bob)及林家“大內總管”Queenie、麥玲玲與好友Alfred、麥美恩與雷Sir。阿Bob一出場就要Queenie孭起他，之後又以“大包圍”方式玩遊戲，更豪言︰“如果咁樣都中唔到兩三個字，我食咗你呢部電腦。”首集的其中一條問題是“根據家計會資料，邊個係影響夫妻性生活嘅首要原因？”Queenie一句話令阿Bob與太太的夫妻生活成為被眾人攻擊的焦點，阿Bob更揚言要直播“閨房事”反擊。C君也笑言：“阿Bob不時施展抵死的‘大包圍’招數博大霧，搞到我要和他大玩Side Bet。”

    今次亦是C君首度撇甩陸永回歸TVB做主持，他雖然一度被負責刁難他的Jojo以一句“冇仔女嘅兩公婆，佢哋嘅婚姻平均維持到幾多年呢？”拋窒，但亦貫徹“無聊爆肚金句王”本色，失驚無神就窒回對方一句，麥玲玲都被他窒倒。而三位主持人中，以Lisa最出位，認真作答卻傻傻分不清問題，一句“因為個男人放咗個BB入去，令到佢鹹濕”令各人一頭霧水兼笑爆全場。

    C君亦對Lisa讚不絕口：“佢參選（港姐）時我已經覺得佢相當有幽默感，佢間唔時會爆一、兩句爆笑嘅；同埋佢有一種純真，嗰種純真嘅幽默對個節目非常有幫助，甚至乎我自己成個節目都係睇佢，成日好期待‘你有咩講呢今次？’可能會突然有一句未必啱文法同表達到意思，但又有喜劇效果喺度，我覺得Lisa先至係呢個節目不可或缺嘅元素。”