孤高自許海明威

    唔識海明威，當亦知其大作《老人與海》。威伯係美利堅大作家，乃花旗文化標桿，與銀幕硬漢尊榮雙劍合璧，認係美國精神支柱。也難怪，花旗國歷史短，文化水淺，搵個傑人孭得飛者亦非易事。

    威伯做過記者，第一次世界大戰打過仗，得過英勇勳章；採訪過西班牙內戰；二戰期間，曾將遊艇改成巡邏艇，偵察德軍潛艇；又參與解放巴黎。更有者，佢曾做過蘇聯間諜，卻從無搜得情報。如斯經歷，自然古仔多。加之筆頭好，其小說平白易懂，行文簡練卻驚心動魄，作品成名當順理成章，唔少花旗仔係睇佢古仔大。

    威伯筆下喜言男性剛強勇猛，對女性卻既懼且恨，通常會早早歸西，甚至不容出現，《老人與海》由頭到尾就只有光棍一條。理由係“欲想人生自由，千祈咪有女友！”然佢卻有四度婚盟。

    “孤高自許，目下無塵。”雖如此，仍無損威伯江湖地位。六十二年前今日，威伯吞槍，年六十二。

    西門公子