養仔花費大慳住使

    陳凱琳爆老公冇送生日禮物

    陳凱琳、梁芷珮昨日現身尖沙咀The ONE，出席“藍 · 惜地球”活動，二人孖住做模特兒，穿上環保設計服裝，宣揚環保。剛度過三十二歲生日的陳凱琳，自爆生日當天與老公鄭嘉穎簡單地吃飯慶祝，之後都有與家人遊船河享天倫樂。

    陳凱琳昨日受訪時說自己注重環保，想延續到小朋友都有美好生活：“我屋企都備有環保袋，每個人都做多步、唔用膠袋，出街買嘢我都會帶定環保袋。”

    陳凱琳剛度過三十二歲生日，她表示：“我當日同老公鄭嘉穎簡單地吃飯慶祝，我哋去咗間好浪漫嘅餐廳，因為有Live band，可以隨時點歌，老公都點咗首歌畀我聽。我亦有叫佢唱畀我聽，但佢話喺屋企都成日聽佢唱㗎啦！本來我想帶埋三個仔一齊去食飯，但小朋友到夜晚會攰，所以只好和同老去，老公冇送我生日禮物，因為養小朋友使費好大，又要供讀書又要補習，我都叫老公唔好亂咁使錢。”

    陳凱琳除了與老公撐檯腳慶生之外，她亦有與家人去遊船河享天倫樂，但因為細仔年紀尚小，沒有同行。她笑言：“我都好耐冇出海游水，所以特別選着自己最鍾意嘅粉紅色泳衣出海，（泳衣款式是否好性感？）老公見到都嘩咗一聲，其實係健康性感嘅三點式，款式同當年我選港姐時差唔多啦。”

    梁芷珮自認環保達人，即使夏日炎炎都盡量唔開冷氣：“因為循環影響生態，再唔環保，連冰川都會冇，所以一環接一環。嚟緊我想去北極拍新一輯旅遊節目，如果見到動物我會即時開Live播畀小朋友睇，希望教佢哋多啲課外知識。”她期待可以見到北極熊，問到有什麼裝備要準備時，她表示剛去完南極拍節目，所以可以用回同樣的禦寒裝備，她透露在南極最難忘的是見到好似人一樣高的企鵝。