昨日賽事總投注二百一十萬

    一練兩騎搏殺起孖

    昨天草地黃昏賽結束。是仗戲碼平淡，五場總投注共收二百一十萬七千元。

    頭場六班千五米，高君濤騎賀廄“聯安百勝”率先開餬。此駒上次同程由普健士主轡，跑第五熱門落敗。拼後小休換人再戰，今次用高君濤跑原程捧成兩倍熱門。騎者出閘快步跟前守住三四位，沿途小心翼翼，待至入直路才發力衝刺，埋門甩開對手先拔頭籌。“聯安百勝”換人收復失地，贏來游刃有餘。高君濤、賀蘭杜夫攜手添頭馬。

    第二場賀蘭杜夫起孖。旗下“必勝之選”由劉傲主轡，以大熱姿態取勝。此駒上仗交普健士搏殺，因直路坐包廂無法突圍，最終只跑第三飲恨。拼後走馬換將再來，今次用牌仔減磅出擊。劉傲出閘快步放出搶先守住內檔好位，入直路全力衝刺，最後二百米突圍而出，贏至對手無力招架。“必勝之選”收復上仗失地劉傲居功不小，賀蘭杜夫連中兩元收穫不俗。

    第三場田中正一贏陳俊輝廄“微妙玄通”。此駒季內夥拍騎者屢有戰功，人馬堪稱好拍檔。上次千五米力拼第二未竟全功，今次原裝配搭捲土重來，出閘搶先放頭，沿途貼欄而跑，一口氣直帶到尾，贏來全無壓力，替馬房增添進帳。

    第四場田中正一搏殺起孖。此子贏完“微妙玄通”乘勝追擊，是場騎馮廄“祥駒”快放輕取對手。此駒上次打吡預賽徐錦輝主轡，出閘放不出頭落敗。今次改配田中正一執鞭表現截然不同，騎者閘開應聲彈出，全程領放一氣呵成帶返終點，替馬匹補中。馮耀正廄添一W，田中正一梅開二度。

    尾場劉傲起孖。此子騎何華麟廄“喜運孖寶”，以快放姿態大勝對手。此駒上次中野省吾主轡跑千五米力拼得梗頸四，今次轉戰千二米用牌仔操刀減磅再搏。騎者出閘快放直帶到尾，贏至對手離行離列替馬匹勝回一仗。麟廄添頭馬，劉傲起孖食尾餬埋齋。