肥媽上《獎門人》狂啜伍仲衡

    父親節特備節目《獎門人I Love爸爸感謝祭》，曾志偉帶領“獎老”阮兆祥、錢嘉樂、麥美恩、徐文浩和林秀怡主持，首個遊戲“開心無敵傳紫菜”已笑料十足，肥媽、伍仲衡和車婉婉打頭陣出戰，肥媽起初捉住伍Sir係咁啜，後來伍Sir主動出擊捉返肥媽轉頭，場面爆笑。兩隊嘉賓陣容均來自《中年好聲音》，有“靠實力”隊的肥媽、周吉佩、李佳、林鉫徫、魏嘉信、李思林和劉智衛，對戰“衡車好聲音”隊的車婉婉、伍仲衡、龍婷、顏志恒、支嚳儀、曹敏寶和梁浩銓。

    龍婷在“開心無敵口噏噏”被超繞口的急口令考起，由於她咯咯聲地讀出“個個國家嘅國歌都係用嗰個國家嘅國家級歌星唱國歌嘅”，搞到負責估的顏志恒忍不住問：“係咪雞呀？”玩到瘋狂標汗的志恒，更要其他人出手幫忙抹汗。之後獎門人安排吉吉、劉智衛和肥媽傳紫菜，豈料“蠱惑的紫菜”突然飛走，搞到肥媽和吉吉啜了一啖，之後肥媽搞笑“投訴”兩位男士喜歡咬人。到“開心無敵估歌仔”戰況更激烈，吉吉、伍Sir和魏嘉信瞓身搶咪撞埋一堆，最後由伍Sir殺出重圍估中答案。