鼎爺認生意合併被接管

    前日，李家鼎（鼎爺）出席代言品牌懸浮鑊活動，即場教授烹飪技巧，莊思明則任助廚，吸引不少市民圍觀，品牌老闆亦有到場支持。思明與男友楊明經營的燉湯生意，因疫情關係已全數結業，會否打算東山再起？她說：“冇錢呀，做嘢賺吓錢先。”平日間中會下廚的思明，被問到可想跟鼎爺合作拍飲食節目，她笑言當然會想，若鼎爺不介意她論盡及手腳慢：“我煮嘢食要煮幾粒鐘，（煮九大鬼簋？）唔係呀，我準備啲嘢畀人多，切嘢又切得慢，有時又要上網睇啲步驟，唔可以好似鼎爺咁快手，不過鼎爺好好人，教我整麻婆豆腐。”

    鼎爺當日即場示範兩道家常小菜“雪菜毛豆豆腐乾炒豬肉”及“西蘭花唐芹西芹炒蝦仁”，當然少不得示範拋鑊，並由莊思明擔任助廚。期間又邀請現場一位觀眾上台跟鼎爺一齊下廚，鼎爺更分享煎蛋不黐鑊技巧。鼎爺表示，疫情過後所經營的餐廳生意亦有好轉，又稱餐廳早前與其他集團合作，被接管開展業務。至於會否再發大搞，就要雙方商量及看環境而定。