美國形象話尊榮

    花旗佬一提起尊榮，即時耍冧。此係銀壇鐵漢，美國形象，一味正氣，不論牛仔抑軍佬，有打必贏，總之唔死。數十年間，花旗仔尊佬上身，以為真係老子第一，天下無敵。尊佬得揚國威，總統亦要授之以勳。

    尊佬當年懵然入局，闖蕩影壇。勝在好運，識得導演，執條好籌。一九三九年拍《關山飛渡》打響名堂，繼而平步青雲，未曾衰過。一九六九年憑《大地驚雷》執個奧斯卡。

    終生拍片百八部，非牛仔即軍佬，形象硬過鐵板，談情免問。佢拍戰爭片，一定美國佬贏。當年拍《硫磺島浴血戰》，打日本仔七個一皮，日皇裕仁訪美，亦要見吓呢位大英雄。

    然尊佬之銀幕正氣，卻無掩其反共狂熱。因言詞乖戾，當年蘇聯老大斯大林聞之嬲爆，乃至曾下追殺令。幸而尊佬比斯公長命，得逃一劫。

    今日乃尊佬一百一十六歲冥壽。

    西門公子