梁朝偉難得開聲窒人 

    英皇電影大曬冷，百幾個明星雲集，二百多名中外記者採訪。花多不眼亂——正中最前位置：梁朝偉、劉德華，兩旁是成龍、謝霆鋒，影壇四大金剛齊集中央……偉仔和華仔之間夾着“阿Sa”蔡卓姸。不言而喻，英皇的掌上明珠了。係娛記都知，受寵靚女不容絲毫冒犯的，稍有出語不善，後果……不料，影帝中影帝，突然出言冒犯阿Sa——

    劉德華與梁朝偉在《無間道》之後十八年再合作拍《金手指》，夾在中間的阿Sa就是女主角。她禮貌周周，謙稱與偉仔、華仔合作，承蒙指教，學到好多嘢……“係呀，同我合作，當然學到嘢啦！”平時謹小愼微，甚少説話的梁朝偉，竟然大讚阿Sa ：“你學到我哋遲到、偷雞和駁導演嘴——”係人都知是幽默講笑，突然熱鬧氣氛斷片，沒有下文。

    哎呀，阿Sa身在“福中不知福”了，旣然被影帝大讚學到“遲到、偷雞、駁導演嘴……”衆皆矚目之際，竊以為，她大可輕輕一語：“多謝！你以為我係‘蔡朝偉’咩？”

    梁朝偉難得出語窒人，阿Sa死火，並冇鞠躬說“多謝指教”便訕訕而去，浪費了“蔡卓姸變了蔡朝偉”的搞笑標題……留下兩位“無間道”在台上“雞啄唔斷”……兩位老友，私下甚少見面，偉仔踢爆華仔間中請他吃飯，又送紅酒；華仔已恭喜偉仔成為亞洲電影大奬影帝，並説：“還要請偉仔吃飯再慶祝，再送紅酒。”

    談笑皆攞奬，來往皆紅星，曾與楊紫瓊合作的偉仔已送上祝賀：“她每次攞奬都有通知我。有一次，楊紫瓊視像給我報喜，我未瞓醒，見到對面好多人，我即刻㩒住頭髮。今次，她沒有視像給我，我已傳短訊恭喜她。”

    攞奬攞到手軟，已有十多個影帝奬座，是否以攞奧斯卡奬為目標？“拍戲，好講緣份。”攞奬如探嚢取物的梁朝偉，深懂箇中玄妙，“不會刻意籌劃，要發生就會發生。”劉德華也有攞奬經驗：“隨遇而安。”

    高  梁