昨晚賽事總投注近一百九十萬

    高君濤搏殺起孖

    昨晚沙草混戰完結。是仗淨跑五場本地馬，總投注額共一百八十九萬一千元。

    頭場四、五班混戰，蔡義武騎摩廄“俊星威威”後上先拨頭籌。此雙人馬上次跑同程，後追不及跑第二未能贏馬。拼後小休原裝配搭再戰原程，騎者出閘跟住五六位，沿途小心翼翼，入直路發力衝剌，埋門甩開對手直奔終點，替馬匹取得今季首W。“俊星威威”連仗交蔡義武主轡有不俗表現，今次贏馬居功不小。摩加利、摩利高父子兵喜添頭馬。

    第二場高君濤贏馮廄“奧新旋風”。此駒上次騎者執鞭捧成熱門死火，敗後小休重新操練。今次原裝人馬跑原程，遇上同場有馬孭飛，公眾熱門獨贏竟有三倍。高君濤出閘快放跟前，沿途有廄侶“盛通寶貝”作開路先鋒，入直路彈甩對手贏來從容。“奧新旋風”沙地短途起家，轉投馮廄後兩戰取一W，練者有交代，高君濤亦居功。

    第三場田中正一再贏陳俊輝廄“順天應時”。此雙人馬季內表現穩定，上次同程贏後小休再來。今次升上二班遇上同場一群不穩對手，臨場獨贏被捧至兩倍大熱，結果飛到馬到，蝕分馬贏來全無對手。“順天應時”季內五W愈戰愈勇，田中正一騎來分外夾檔。

    第四場林宏基廄包辦馬房Q。是場練者派三駒出戰，“十全十美”由劉永康押陣， 以強勁衝剌後上挫敗廄侶“寶湖之友”。此駒來澳跑過多場無寸功，上次交劉永康跑草地得第八。拼後原配轉戰沙地，今次出閘包尾，沿途亦步亦趨，轉入直路如飛殺上，埋門愈跑愈有，輕鬆挫敗同廄“寶湖之友”，替馬匹打開來澳勝利門。劉永康添頭馬，基廄包辦馬房Q，收穫豐富。

    尾場高君濤起孖食尾餬，此子騎賀廄“大財運”以後勁退敵。此雙人馬連場搏殺未能出頭，上次千五米埋門僅敗。今次原裝配搭再來，騎者發揮水準替馬匹取得在澳開齋頭馬。賀蘭杜夫廄食尾餬，高君濤起孖。