戴祖儀蔣家旻玩轉飲食節目
譚俊彥（Shaun）、戴祖儀、蔣家旻及江嘉敏昨晚亮相《做節必食18 道菜》節目，品嘗廣東的新春菜式，包括玩味濃的舊菜翻新“花樣年華”、集合滿漢全席一百○八道菜烹調精髓的“茅台火焰東山羊”及以八種矜貴食材炮製而成的“八仙過海”。
戴祖儀、蔣家旻及江嘉敏三人參與節目，帶來熱鬧氣氛，三人品嘗材料豐富的“八仙過海”時更爭食鮑魚、金蠔及花膠等名貴食材，嘈到拆天！戴祖儀與蔣家旻又瘋狂互窒大放笑彈，當二人入廚幫手撻蝦膠時，雖然手勢同樣麻麻，但卻仍有閒情鬥嘴，十分搞笑。
去年在綜藝節目《男神廚房》中已大展廚藝的Shaun，今次再大曬功架示範處理龍蝦，他分享心得謂：“其實有啲軟骨位（指龍蝦尾），只要一啪斷佢之後再一抽，就可以成條（龍蝦肉）抽晒出嚟。”由於Shaun有姿勢兼有實際，師傅見狀都忍不住大讚他專業。
