西宮琴華麗轉身

    西宫陰險，史上如是，粵片亦然。“西宮琴”琴姐乃銀壇一絕，無人夠佢既靚且奸。與余麗珍東西兩宮，雄霸粵片影壇數十年，已成註冊商標。自兩人先後歸道山，至今仍難尋如斯一雙活寶，在銀幕鬥法。

    琴姐係馬交女，襁褓居澳，父開米舖錢莊，生活無憂。就讀白鴿巢勵群學校，少齡與母平安戲院睇戲，竟然上癮，遂入梨園學戲。自梅香而二幫，再而成“二幫王”，琴姐終成業內翹楚。

    昔日影人多有結義，琴姐與任冰兒、朱日紅、金影憐、英麗梨、梁素琴、許卿卿、黎坤蓮、譚倩紅結義成“九大姐”，琴姐年長成一姐，曾合組公司拍片。

    先奸而後忠。琴姐憑電視劇華麗轉身，由是慈母善嫗，戲路縱横，越老越可愛。如此轉型，足與石堅叔比肩。呢代戲人，入得廚房，出得廳堂。影壇綠葉，老成凋謝，買少見少。

    今日係琴姐九十一齡冥壽。

    西門公子