袁偉豪憑歌寄意走出低谷

    日前袁偉豪(Ben)作客TVB娛樂新聞台節目《StarTalk》，接受主持人許文軒(Edmond)專訪，大談推出新歌《馬路英雄》感受。

    Ben直言今次出再出歌可說是圓夢：“今次首歌嘅曲詞編監唱、和音、結他和MV導演自己都有份參與。既然上一首歌係抒情，不如今次《馬路英雄》整首節奏感重，歌詞部分一日完成。因為個題材自己好有感覺，因為我太鍾意揸車，好享受揸車嘅感覺。我連車裏面嘅座位、音響、氣氛、馬力都好講究。首歌總共錄咗兩日，第一日之後覺得唔滿意，隔咗成個月先再錄。

    中間過程問咗好多朋友意見，包括謝東閔、單立文、胡蓓蔚，仲請教咗歌唱老師。”

    談到近年受批評，歌詞中有一句是“沉着氣給禮讓先最強” ，他說：“其實好大壓力，但我好被動，嗰段時間好低潮好迷失。覺得工作上付出咗咁多，反而惹來外來嘅聲音，專注唔係工作上。而且仲成為箭靶，覺得有啲唔公平，變咗有一種好失落嘅感覺。成個人都冇晒光彩，跌咗落漩渦中。其實都要多謝黃翠如，佢知道嗰時我有壓力，問我有冇事。佢上咗嚟我屋企傾偈，臨走之前叫我Delete咗個社交App唔好睇，到咗自己強大咗先算。我喺佢面前Delete咗！”