朱敏瀚入行十二年首擔正

    朱敏瀚（朱仔）、王敏奕(Venus)、譚嘉儀及黃子桓等，昨日出席無線新劇《虛擬情人》造型記者會，入行十二年首當男主角的朱仔，在劇中飾演由Venus所創造的AI機械人，他直言已有心理預備要露肉。朱仔說首度當男主角沒有特別感覺，反而開心接到高難度角色：“半年前知道演呢個角色，覺得好興奮，因為係入行至今最難同最需要做功課嘅一次，（角色似李佳芯主演的《智能愛人》阿寶？）我有睇，今次我演呢機械人就比較人性化，會有幾個唔同版本，同過往AI片唔同。”

    朱仔於劇中可需要騷肌？他說：“我早已有心理預備要露肉，TVB唔會對我咁好，近年拍劇套套都要除衫，以前拍劇都試過裸跑，所以都冇乜好驚。”Venus在劇中飾演創造機械人的設計師，是否以老公曾國祥為藍本？她笑說：“我設計到佢外表要俊朗、心地好同關心我，當係自己嘅完美男朋友，（同朱仔會唔會有親熱戲？）唔覺有。”黃宗澤笑指跟她演情侶有“國防級家嫂保護機制”，Venus笑指對方只是講笑：“如果真係，啱啱拍完嘅《婚後事》咪唔播得，佢只保護我，唔使畀佢嘅粉絲鬧我。”