現身洪嘉豪尾場處男騷

    張敬軒：開心我支嘢晚晚陪住你

    洪嘉豪(Kaho)前晚舉行的尾場演唱會，獲張敬軒（軒仔）現身做表演嘉賓掀高潮。二人合唱過後，Kaho表示一見軒仔的身影在舞台上出現，已經想喊，但為免影響唱歌一直死忍。他謂：“我很希望與重要的人分享自己的第一個個唱，與軒哥相識廿載，但真的估不到能邀得到他擔任嘉賓，仲要拿着你支咪……”

    張敬軒聞言，即曖昧回答：“好開心我支嘢，可以晚晚陪住你……哈哈！最近兩個月同你一齊拍戲，你平日係劇組串串貢，今日做咩咁謙虛，我哋電影《超神經械劫案》近乎成個劇組來晒撐你，勁呀你！”軒仔續說：“Kaho對我來講就像親生細佬，我識佢個陣佢毛都未有……哈哈，唔係，係中學都未讀，讀緊小學。每次講開kaho，係佢媽咪眼中口中呢個仔都係洪家驕傲，鋼琴叻，有天份；係Kaho音樂事業上面，我冇幫佢太多，今日佢企到喺台上，真係全靠佢努力同大家支持。”

    之後，Kaho擁着軒仔激動說：“上次你送支咪畀我，希望我可以係自己個騷到用，我做到啦，我終於有自己個騷，請到你來做嘉賓！軒哥，你等我，下次我去紅館我再請你！”獲全場狂熱歡呼！

    當Kaho到後台換衫時，軒仔又再給Kaho光環說：“我真係好戥佢驕傲，Kaho由低做起，做過舞台音響等好多基層工作，佢唔同一般歌手，相對同齡新人，佢冇那份浮躁。記得有次我係澳門開演唱會，心血來潮叫Kaho上台幫我試下聲，我就落台坐在觀眾席聽，佢驚都冇驚過就戴上Ear Mon，拿住我支咪就唱咗以下呢首歌，之後亦成為了洪嘉豪版本。”隨即唱出特別版的《櫻花樹下》。安歌期間，Kaho在群情起哄下，最終順應大家要求掀衫騷肌，引得台下叫聲震天。