患腸胃炎險廁所暈低

    劉佩玥幸得姑媽救命

    昨日，無線新劇《超能使者》在商場舉行宣傳活動，該劇主要演員陳展鵬、陳山聰、劉佩玥、劉穎鏇、林子善等齊齊出席。眾人向在場居民派送紀念品之外，還大玩遊戲，場面十分熱鬧。

    劉佩玥受訪時，談到日前患急性腸胃炎要到醫院醫治，她表示：“我現在已經康復。當晚我病發時好辛苦，頻頻要去廁所，最後畀姑媽發現，知事態嚴重，送我去醫院求診，救返我一命，否則隨時會喺廁所暈低失救。（是否減肥減出禍？）唔關事，醫生話我係食錯嘢引起，但我真係唔知食錯乜嘢。”之後她笑稱：“其實我真係諗過減肥，因為拍《美麗戰場》時畀葉念琛導演養肥咗，哈哈。（緋聞男友周志文可有探望你？）好多男性朋友都好關心我，佢只係我其中一個好朋友，佢冇嚟醫院探望，因為我只留醫一晚就出院。其實事發嗰晚我只係想發文感謝醫護人員，估唔到原來有好多人關心我。”

    原來不單只劉佩玥當黑，陳山聰的左手尾指亦受傷，他表示：“係前兩日拍電影時受傷嘅，傷及尾指韌帶，要戴固定器六個禮拜，等佢自然好返。原本我受傷時都冇理佢，只係敷冰，但老婆知道後要我去睇醫生，檢查後先發現係韌帶有少少撕裂，要戴固定器，因為唔可以屈到手指尾。”

    山聰笑言現在手指這個“甫士”，好似人家唱歌時拿咪的樣子。問他是否想再闖樂壇？他表示自己並沒有刻意去計劃唱返歌，一切隨緣，有機會便再唱。

    林子善談到在《超能使者》中有一幕要穿T Back跳艷舞，任由臨時演員摸勻全身，他笑言好彩同這些臨時演員唔熟，不過取笑他們十分投入，摸得好興奮。問他可會尷尬，他表示：“咁又唔會，因為拍嗰時已全情投入角色中。（可接受到全裸拍戲？）咁又唔得，最少都要有塊樹葉畀我遮吓。”