首次拍劇好開心

    林敏驄被爆鍾意畀女圍

    昨日，無線台慶劇《下流上車族》舉行宣傳活動，劇中演員林敏驄、江美儀、鮑起靜、郭柏妍、羅毓儀、林穎彤、林景程及黃建東等齊出席。首次拍劇的林敏驄，與不少女藝人同場演出，被劇中演他老婆的江美儀踢爆，指他鍾意畀女圍，拍這劇令他十分開心。

    江美儀與林敏驄合作拍《下流上車族》，她笑言與平日冇厘正經的林敏驄合作，要好有耐心：“佢好似小朋友一樣，要人氹，而且又為食，成日扭計要食蘋果批同飲咖啡，滿足到要求之後就會乖乖開工。我覺得自己係上天派嚟照顧佢嘅。”

    談到首次拍劇，林敏驄表示：“以前我唔拍劇，係因為覺得拍劇咁辛苦，做嚟做乜？但試過之後，原來又唔係咁辛苦，可能係曾志偉總經理入嚟之後進步咗，好似拍電影咁。我得閒到仲有時間整蠱人，同埋作首主題曲。（志偉欽點你作及唱主題曲？）應該係監製邀請我，（點解唔同江美儀合唱？）佢唔掂，要搵專人唱至得。”他又預告劇中會有不少喊戲，他十分認叻：“只係舉手之勞！”之後又與文凱婷即場合唱這部劇集的主題曲《一家人》。

    郭柏妍、羅毓儀在劇中飾演林敏驄與江美儀的女兒，兩人更會穿泳裝演出。 郭柏妍表示：“我喺劇中會着比堅尼，係繼參選港姐後着得最少布嘅演出，由於喺拍攝前一兩日先臨時接到通知，為咗拍出嚟效果好，我只係食菜減肥，成功瘦咗五、六磅，接近選美時體重，出來效果亦有驚喜。”而羅毓儀就透露會在劇中着兩件頭泳衣演出。與鍾意搞笑的林敏驄合作，郭柏妍表示都好開心，覺得對方好好人：“佢知我哋要減肥，等我哋拍完泳衣戲後，買咗牛丸同雪糕慰勞我哋，還有鮑姐同江美儀，三個前輩經常‘萬歲’，真係拍得好開心。”

    另外，林敏驄自爆拍劇初期，睇片見到自己個樣想自殺，他笑言：“因為美儀好瘦，我又頭髮長，顯得我好肥，所以的起心肝減咗十磅。但後來又覺得呢啲都係次要，可以用演技蓋過晒，但點知又有影后鮑起靜喺度。”