明星化妝成話題

    七十四歲的汪明荃，素顏上網，“眞美！”梁思浩品評，相識阿姐三十年，同處咫尺化妝間，看她上妝落妝，得賭“眞顏”，一向皮光肉滑……幾十年來，她都以“番梘”洗面，長青不老，就係咁簡單。

    現任無線高層，多年前主持一個遊戲節目，點評幾位玉女適宜演甚麼角色，“最好演恐怖鬼片。”衆皆抗議，“你哋不用化妝就可以上演。”謔而近虐，衆皆無言。衆所周知，凡靚女者，“沒有化妝不見人”！

    上世紀五十年代，有“亞洲影后”衆稱靚過鬼火。有日，娛聞上了港聞頭條，影后香閨倒臥一個男人；報警後查明眞相，是一名竊匪，月黑風高，摸入香閨，偷竊期間，聞嬌聲嚦嚦：半夜三更，搵乜呀？竊匪回過頭來，“鬼呀！”嚇暈地上，竊匪口供，警方不相信。香閨只有影后獨居，但有先鋒隊員第一時間趕到現場時，也嚇了一跳，那時影后還未化好妝……

    無線曾有劇集，講屋邨師奶教仔：“畀心機讀書做嘢啦，明星，係你追嘅咩，佢個頭都養唔起……”時至今日，更正為“養佢塊面都養唔起……”梁思浩又說，三十年來，見到另一位女星，千千聲一枝潤膚油，十幾款，日日搽上面。結果，“塊面冧咗！”

    “眼見阿姐落妝後，用豬油膏捽面，用番梘洗淨，返屋企…… ”影迷首先不相信，每逢演出，必有大批粉絲守候後台門口，除了大叫“阿姐”外，乜嘢都睇唔到……深更陋巷，大明星大老倌，大都着便服，披上寬闊晨褸，至緊要有個頭笠，只露出一對眼，向粉絲微微鞠躬，助手拱衛下，九秒九鑽上私家車，絕塵而去。收工第一時間飛快返家，找回舒服的環境，還有許多事要善後。卸妝一定要徹底，留下鉛毒，老來面部會起黑斑，粉底便要越塗越厚了。

    卸妝後只用番梘，仍然咁靚！卸妝後十幾枝潤膚露搬上臉，冧咗！廣告商說：化了妝如不化妝，才是上品。

    高  梁