金槍霸操足而臨

    澳馬賽至六月，尚餘不足三個月便告煞科。踏入季尾，每感人疲馬倦。昨周二主課期晨操如常，收操後有兩組馬試閘，夾埋只得六駒，瞄頭平淡。

    蔡鎮威廄上周六又憑“富田威”摘冠，此駒開竅後打疊贏兩場，低分馬陣上跑來有前有後，表現突飛猛進。練者對此駒打理得宜，料季內還有頭馬見面。蔡鎮威由三月至今每月都有頭馬交出，現累計二十四W排名第三位，馬房今季躋身前列四甲應無問題。蔡廄近期攻勢凌厲，上仗跑五場賽事，除浩廄狂勝四W，餘下一W由蔡廄所奪，馬房已連贏多仗，刻下氣勢鼎盛，季尾餘下賽事仍堪追捧。除蔡廄旺門馬房可重視，排名下游的倉口亦要留意。

    謝貴全、李森合作後現有三W排名榜尾，兩位練者成績未有突破。此孖倉共擁二十一駒，計實力屬中型班，但戰駒質素普通，且拼搏多要等回氣。時至季尾，謝、李孖倉除爭取成績，馬匹亦謀交代。看近期備戰動態積極，尤其個別舊馬悉力打磨，一俟操足即派用場。本周打疊跑兩次賽事，周五晚悉先上演沙、草地賽，翌日轉跑黃昏馬。周五謝李聯廄精品列陣，旗下“金槍霸”跑一二班一○五○米。此駒上季尾一役流鼻血敗，唞足十個月再來，健康已明顯好轉。賽前試閘一放到底，走勢上勁上力，生氣重現。“金槍霸”沙地同程擁九捷勝績，屬謝貴全手上皇牌馬，跑短途夠煞食。練者一向不打無把握仗，以往其手上有馬唞足成年，結果一出即勝。“金槍霸”今番操足而臨，復跑短途強項出擊，賽日值得憧憬。