關心姸的生女神話

    孕聞，無日無之。娛人生小朋友，兩種態度：一、順其自然，晩晩努力中；二、生仔不由人，上天賜予的禮物。關心姸(Jade)二十周年演唱會，與囡囡“心心”結伴出場，“好多謝天父帶咗呢位小天使畀我。楊榮心，我等咗你好耐啦。”

    翌晩睇《日日媽媽聲》，Jade有詳細補充：“係心心對我講：媽媽，我在天上等咗你好耐啦。”

    《媽媽聲》中，Jade講她的生女傳奇：結婚十二年了，女兒今年五歲多，即是説結婚之後的六年，Jade都忙着生孩子，中醫、西醫、朋友介紹的秘方都嘗試過，卻無所出。於是放開懷抱去盡情歌唱，十周年演唱會後，大肚了。

    女兒得來不易！Jade與囡囡有個習慣，睡覺時母女攬到實，唱兒歌、講童話。漸長，囡囡略懂事了；有晩，母女夜靜無人私語時，Jade攬着天眞爛漫的囡囡説，阿女，你知唔知，我等咗你好耐呀？六年啦。囡囡趴在母親身上，吻着Jade的面頰，天眞地説：“媽媽，你知唔知呀，我也等你好耐啦。”Jade彈起：女！你喺邊處等我？“天上囉。”

    童言最眞。Jade對當時情景，歷歷如昨。“成個醒晒”，問女：你在天上何處？“一嚿雲上面。”如何等媽媽？“有本書，找來找去，都看不到我媽媽。”媽媽甚麼模樣？“書中告訴我，媽媽頭髮粉紅色的。”找到了嗎？“跟着書中找，撥開雲霧，看到了一位粉紅色頭髮的美麗女人，她在唱歌；等到媽媽了，找到媽媽了。”Jade成個醒晒，又如夢中。

    十周年演唱會之後才生女；“那時的造型，的確罕見，係粉紅色頭髮！”才被坐在雲端的女兒等到了。

    言之鑿鑿，信不信由你，這是神話。中國古語亦有“天賜麟兒”、“緣訂三生”。講古唔好駁古，最誇張莫如粵劇《天姫送子》、《天仙配》，棚戲必選的爆棚劇目。信！不必迷。

    高  梁