關心妍與蕭正楠話當年

    關心妍(Jade)紀念出道廿周年演唱會，前晚於紅磡香港體育館舉行頭場。心妍身穿由陳華國設計的銀色閃裙現身，兩側開高衩大騷美腿。全場苦候多年的歌迷用熱烈掌聲支持偶像，令Jade也忍不住眼濕濕。

    Jade在開場後一口氣唱出多首金曲，包括《負擔不起》、《龐貝廿一世紀》、《優先訂座》等等。她表示要極速籌備今次個唱充滿挑戰，但仍希望以最佳狀態完成與歌迷的約會：“今次演唱會主題叫做約，約係一個信念、一份堅持、一個盼望。”當晚Jade狀態十足，除了獻唱金曲外，又一騷音樂才華，自彈自唱，更從舞台頂吊下色士風演奏。

    Jade囡囡楊榮心前晚擔任嘉賓，母女檔合唱《Smile》，令樂迷非常興奮。不過當囡囡上台打筋斗時，Jade就顯得好緊張：“等咗你好耐啦！聽講你想在紅館打筋斗，今日終於願望成真啦！你使唔使先拉筋？得唔得？”

    當晚Jade亦邀請了“同年新人”蕭正楠做嘉賓，兩人十多年未有同台演唱。當蕭正楠現身時，全場尖叫，成為個唱高潮位之一。在合唱《特別鳴謝》後，蕭正楠在台上話當年：“真係好多年冇唱呢首歌，好多朋友在K房唱呢首歌都炒車。諗返當年拍MV，發現Jade咁多年都冇變過，大家要畀多啲掌聲Jade。原來真係過得咁快，多謝Jade邀請，讓我有機會再在紅館舞台上體驗。”