藝術家成功鐵律

    法國作曲家比才，未必人人識，然其名作歌劇《卡門》總或聞之；若或未聞，總聽過劇中名曲《愛情係隻開籠雀》；甚或真係唔知，都會哼吓嗰首《鬥牛士之歌》。因為此乃史上演出最多之歌劇。

    比才公天資聰穎，四歲閱譜，九歲破格入讀巴黎音樂學院。雖獲獎無數，惜懷才不遇，撈極唔起。偶為戲劇《阿萊城姑娘》配樂，簡編成組曲，竟一鳴驚人，一洗頹氣，成傳世名曲。

    嘔心瀝血，歌劇《卡門》既成，首演卻冷水淋頭。佢唔寫王孫貴冑風花雪月，着眼草根階層社會現實，尤其女主角卡門放蕩不羈，於斯時被抨傷風敗俗，世道不容。比才公心力交瘁，僅三月餘即心臟病發而卒，年僅卅七。

    然比才公證明了藝術家之成功鐵律，即死咗至值錢。《卡門》其後一時轟動，紅遍全球，至今歷演不衰，未睇過都識哼兩句。

    一百四十七年前今日，比才公鬱鬱而終。

    西門公子