如意娉婷可建奇功

    昨朝晨操如常，收操後尚有兩組試閘，但夾埋不足十駒，瞄頭平淡。第一組兆廄“家裏有礦”由葉杏芳主試惹人注視。此駒出閘快放，三扒兩撥竄上直帶到底，大勝對手成條街。“家裏有礦”評分過百之駒，與同組馬實力有差距，此課大閘贏條街表現勇猛，稍後出賽可重視。此駒鞍上人葉杏芳是男性騎馬人，在兆廄工作有一段日子，最近加入騎術學校受訓，但要考核合格才有機會出賽。澳馬場現時騎師人手緊張，倘有生力軍補充可緩解騎師荒。

    蔡鎮威上周六出擊又得手，憑“金玫瑰”及“型仔合金”起個孖寶，頭馬增至二十三場，龍虎榜排名第三。上仗“金玫瑰”在任布利胯下影相險勝“逍遙尖子”，人馬贏得漂亮。任布利季內騎蔡廄馬交得準繩，成馬房冷殺手。“型仔合金”張志立亦發揮水準，贏來全無壓力。此質新馬演出進步，屬蔡廄重要取分棋子。蔡鎮威於三月分高中三元後，四、五月頻頻起孖，剛在前仗捧走打吡預賽獎盃，上仗又起孖寶，氣勢一時無倆。練者開倉後成績一年好過一年，今季暫取二十三W，頭馬數字比上季有突破。本季賽至埋尾，蔡鎮威要摘冠似天方夜談，但保住三甲不屬奢望。周六賽期將至，今仗續跑草地日馬。任布利、蔡鎮威此雙騎練又來搵食。

    威廄“如意娉婷”報跑三班千五米，此駒前兩仗用牌仔贏後隨即回氣，馬匹連敗後重新操練，昨朝由任布利親試一課，走來火力俱佳。“如意娉婷”同任布利一向最夾檔，人馬有三捷紀錄支持。今於三班作戰有着數，出爭千五米亦為首本路，憑騎者駕輕就熟，可建奇功。