太太撫慰喪母悲痛

    袁文傑珍惜阿媽湯水

    由余安安、羅敏莊、陳凱琳擔任主持的《日日媽媽聲》第二輯，前晚播出的第六集，請來薛家燕、伍文生及袁文傑擔任嘉賓。二○一八年時袁媽媽因病離世，袁文傑傷心不已，與女友張潔蓮(Jackeline)的婚禮，亦因而延期兩年。袁文傑在節目中憶述媽媽離世情況時，還是忍不住數度哽咽。

    原來袁媽媽離世當天，碰巧袁文傑要參與大型外景場口拍攝，但一心想陪袁媽媽“度過最後一段時間”的袁文傑，還是盡力與劇組協調，Keep住來回往返醫院及拍攝場地。可惜因袁媽媽情況反覆，最終袁文傑還是未能趕及見袁媽媽最後一面，袁文傑遺憾地說：“好記得再次趕去醫院，電梯門一打開，Jackeline坐喺張長櫈度，同我講你唔使咁趕……”

    袁文傑坦言，全靠太太Jackeline的陪伴，才能從喪母傷痛走出來，他說：“由媽媽走時開始，我冇崩潰過，只係感覺個心好似慢慢畀嘢刮緊，多得Jackeline喺我身邊，佢冇畀任何壓力我，我需要乜嘢，佢都盡量幫我。”

    袁文傑在節目中，亦分享了昔日與媽媽的相處點滴，他坦言之所以能夠在娛樂圈堅持下去，全靠媽媽的支持以及無微不至的照顧：“無論我開工到幾夜，佢都會瞓住等我，煲返熱啲湯畀我飲。依家啲人成日唔返屋企食飯，特別係唔飲嗰啖湯，遲啲就知味道。”

    他指很遺憾沒有留下太多與媽媽的合照：“細個爸爸媽媽都要為口奔馳，邊有咁多閒情逸致買相機，去到近呢廿年環境開始好啲，但媽媽身體開始唔係咁好，睇返啲相見到佢都係比較憔悴。”袁文傑又指媽媽還影響了他的做人態度：“佢教我做嘢要公平，唔好太過計算，我一直有記住。”