苑瓊丹否認搵老公打理生意

    近年專注在內地發展的苑瓊丹，日前在香港有份投資的超級市場開幕，她未能返港參加開張儀式，但都有透過網絡直播亮相，與其他股東齊齊慶祝開張之喜。

    苑仔表示：“投資咗幾多錢就唔講啦，最緊要有錢途，我睇好前景就夾一份囉！疫情期間超市生意都好好，因為大家都留屋企食飯，睇準需求就有得賺，嚟緊我哋班股東都會開拓自動販賣機市場，希望都有作為。”

    自從新年後北上發展，苑仔與老公數月未有見面，她說不會叫對方幫手管理生意，笑指二人財政獨立“各有各搵”：“有人問我係咪夫妻分隔兩地，見老公太得閒，所以開檔嘢畀佢忙吓？傻啦，我理得佢忙定得閒吖，佢真係悶到發癲又掛住我嘅，咪上嚟陪吓我囉，佢肯為我隔離，呢個就係愛嘅表現啦！”