昨日賽事總投注二百二十六萬

    兩練一騎起孖建功

    昨天草地賽完结。是仗戲碼較強，六場總投注額共二百二十六萬一千元。

    頭場錢廄“國金大師”由劉永康操刀，後上先拔頭籌。此駒季內未贏過，最叻沙地跑入一次位置。上次同程落敗而回，拼後易配劉永康再搏。騎者出閘留住跑，入直路發力衝刺，埋門力擒大熱門“耀昌大師”，替馬匹打開勝利門。錢健明、劉永康攜手添進帳。

    第二場賀蘭杜夫贏馬，旗下“美麗之選”由牌仔梁曉傳掛帥，後上挫敵。此駒贏過一場沙地後再無建樹，季內連敗多仗求減分。今次落班用牌仔梁曉傳搏殺，騎者留放有度，埋門勇挫對手，替馬匹勝回一仗。

    第三場梁曉傳、賀蘭杜夫攜手起孖。騎者贏完“美麗之選”乘勝追擊，騎賀廄“聯安神將”以凌厲後勁，撼低“家裏有礦”，替馬匹取得第二W。此駒一向跑千五米為首本路程，上次千二米田中正一跑得接近，今次用牌仔減磅再搏。騎者以留前鬥後戰術後上取勝，人馬贏得漂亮一仗。賀蘭杜夫、梁曉傳齊中孖寶，收穫甚豐。

    第四場艾比贏蔡鎮威廄“協會八號”。此駒上次張志立跑同程得梗頸四，拼後走馬換將再來。今次用艾比主轡，騎者跑來左片右片後上掄元，替馬房添進帳。

    第五場張志立贏張兆煊廄“永和”。此駒上次千五米無功而回，敗後換將縮程再戰。今次淋地作戰如魚得水，臨場捧成熱門，騎者以較佳留放後上取勝，替馬房建功。

    尾場兆廄憑“明軒一號”爆冷起孖。此駒交蔡義武主轡，出閘快步跟前，沿途且戰且走，入直路後上挫敵，爆二十七倍冷W。蔡義武喜添今季第二W，張兆煊是仗一口孖寶食尾餬埋齋，成績躍進。