魯振順含淚爆三大遺憾

    無線綜藝節目《360秒人生課堂》前晚播出最後一集，壓軸演講嘉賓分別為魯振順及林盛斌。

    一九七八年報讀第八期無線電視藝員訓練班入行的魯振順，在逾四十年演藝生涯中遇過不少挫折，更曾因有感事業零起色，以致看不開割脈自殺，因而傷透了媽媽的心，成了他與母親第一個遺憾。

    隨着母親年事漸高，魯振順坦言：“我睇見阿媽開始老，好擔心，佢話唔好送佢入老人院，佢死都要死喺屋企。我當時雖然演好多經典角色，但好睇唔好使、賺唔到錢，自己都照顧唔到自己，我邊有能力照顧阿媽？終於將阿媽送咗入老人院。”之後他雖然密密到老人院探望母親，但仍彌補不了他的第二個遺憾。

    直到二○一七年中秋節，母親急性肺炎入院，當時工作極繁忙的魯振順又要開工、又要照顧母親，心力交瘁：“中秋過後第四個晚上，當時我喺尖沙咀拍緊外景，阿媽離開咗我，我連佢最後一面都見唔到，我覺得好遺憾。”背負着三個遺憾的他，最終含淚強忍悲慟，呼籲大家珍惜眼前人。