友心馬快有力添食

    今晚沙地跑五場，因各場出馬較少，可謂塘水滾塘魚格局，預計賽果大冷大熱居多，投注跟紅頂白，要識執生。

    馮耀正季內成績不俗，龍虎榜上一直帶頭，上賽後被錢健明反先兩W，現時排名居次。季內可否重返榜首尚未知，但馮廄戰駒經一輪拼搏，不少馬要回氣，待唞完再上戰陣。馬房近期“立油”，守齋三次後整軍再戰。今仗沙地精品出擊，全晚六駒分由幾位心腹騎師搏殺，睇環境會“郁手”，臨場可吼。

    第二場：五六班一五一○米。“無限讚美”今季沙地取一W後，迄今再無頭馬見面。近兩戰亦無功而回，但馬匹已減分，於五六班混戰有微利。此駒沙地唯一出路，後勁可取，鬥直路夠煞食。今次易配張志立主轡，憑此子近期大順手風，拼盡可替馬匹勝回一仗。

    第四場：三班一三五○米。“飲就兄弟”沙地好手，前速煞食，季內演出可人。上仗高君濤贏完再來，今次重返一三五○米出擊更有把握。復配梁曉傳操刀，此子騎過多次亦駕輕就熟。憑馬勇路合，再贏唔奇。

    第五場：四班一○五○米。“友心”上仗同程贏來雖險，但初出新馬表現已不差。此駒潛力未盡露，全熟後評分料有上升空間。“友心”新勝重來，今次升班減磅，論形勢未算吃虧，續由高君濤熟手操刀，憑馬快路合，有力添食。