MV分飾八角考演技

    馮允謙解鎖搞笑潛能

    馮允謙日前為新歌拍MV，雖然MV由清晨開始拍攝，但他越演越精神。即將在七月舉行首次個人演唱會的他，最近正忙於為籌備開騷練歌和健身，狀態大勇。

    唱作歌手馮允謙(Jay)日前為新歌拍MV，連續十八小時拍攝，更不停變身，一人分飾輕佻的外賣仔、憤怒的新聞評述員、狼狽的外景記者、誇張的廚師、作狀的魔術師、浪漫的韓劇男主角、現實中無聊的自己，以及夢中有型的自己等八個角色。雖然零演戲經驗，但Jay十分投入角色，七情上面，獲導演大讚“演技大爆發”。

    為追趕拍攝進度，Jay自薦犧牲食飯休息時間，配合食飯盒的場景，在攝影機前真開餐，邊食飯邊演戲。之後扮演新聞評述員的時候，為演繹他對無稽新聞的憤怒，掃跌檯面十幾支咪高峰後，臨場加演跳上檯指罵鏡頭的戲份。扮外賣仔時，他咬住牙籤一臉輕佻，還加插MJ舞步，導演讚他演技爆發，Jay害羞地說：“好尷尬啫！”

    今次新歌由Jay作曲，是他較少創作的趣味性風格。他說：“呢首歌比較輕快和有趣，配合歌詞和MV係一首輕快歌。點解係Nightmare（惡夢）？因為疫情影響到好多人的日常，例如面對好多規限飛唔到、見唔到屋企人和另一半，好似我咁。一年兩年，好似發惡夢，瞓醒仍然在夢中，大家都好攰。雖然係咁，仍希望積極樂觀面對，期待好快回復平常生活，大家一齊加油。今次MV用咗好多粉彩色系，希望帶出正能量、陽光氣息。”

    對於被讚演技爆發，Jay說：“其實我唔係好演員，唔係有好好演技，不過比以前無咁怕醜，可能因為拍多咗MV，搵到方法打開自己。而且三十歲後的我，對人生多咗唔同睇法，容易感動，變得敏感。今日呢個MV有的時候需要誇張啲演繹，估唔到開發咗我的搞笑潛能。”